وبقيت حريـــــــف؟؟؟

ولانك مش اول مرة بتكذب
لايق دور الكذب عليك
وايديك
شايلين التورته ومش خايفين
علشان عارفين
ان انت لعبت اللعبة كتير
وبقيت حريف
وان انت بتعرف كيف تختار
علشان مشوار
الكذب مشيته يا صاحبى سنين
والبنت ام ضفاير حلوين
سهرانة الليل مش قادرة تنام
شبعانة كلام....
سهرانة بترسم سهم
بيجمع بين قلبين
سهرانة بتحلم مش خائفة
ولا عارفة السهم هيجرح مين
وهيعمل ايه
ولانك مش اول مرة بتكذب
عارف انت بتعمل ايه
والكذبة الاولى بتتكرر
وبشكل جديد
بس اللى اكيد
ان النهايات هتكون واحدة
دة لان اللى بيخدع واحدة
مش صعب على يخدع الاتنين
وانا نفسى تقولى:
بتكذب لية ؟وبتخدع مين؟
هوة انت بتضحك على روحك
ولاانت بتضحك على التانيين؟
لو كنت بتضحك على روحك
فاانت الخسران"
وان كنت بتضحك على غيرك
يبقى انت جبان"
ازاى اخلاقك تسمح لك
تخدع مساكين ...؟؟؟
وبميت سكين
بتقطع فروة سمعتهم
وسيرتهم تصبح سليوة
على كل لسان....؟؟؟
ماانتاش انسان ؟ماانتاش بتحس بقيمة شرف البنى ادمين؟؟؟؟؟
والبنت ام ضفاير حلوين
غرقانة فى بحرك ولا فاهماش
مش قادرة تصدق انك فعلا واد بكاش
مربوطة فى ايدك ولا عاملاش
ايتها حساب
لكلام يتقال او اي حديث
بس الحواديت
مش دائما تخلص بالزفة
زى الافلام
ولا اى كلام
يتقال فى الدنيا بيتصدق
دة الصدق بعيد
ولانك مش اول مرة بتكذب
عارف امتى تقول وتعيد
وتعيد وتزيد .....بس انت اكيد
اول ماهتخلص من ديا
هتدور تانى ....علشان تلقى حد يسليك
ولانك مش اول مرة بتكذب
هتليق الكذبة ضروري عليك
وايديك هيشيلوا التورته ومش خائفين
علشان عارفين
ان انت لعبت اللعبة كتير
وبقيت حريف ؟؟؟؟
اتمنى تعجبكم انا اسف نزلت باللغة للعامية بس سامحونى وكل سنة وانتم طيبين
اخوكم احمد